पंढरपूर सिंहगड येथील विद्युत अभियांत्रिकी विभागामार्फत दुसऱ्या, तिसऱ्या व अंतिम वर्षाच्या बी.टेक विद्यार्थ्यांसाठी ओरिएंटेशन कार्यक्रमाचे आयोजन
एस.के.एन. सिंहगड अभियांत्रिकी महाविद्यालयातील विद्युत अभियांत्रिकी विभागामार्फत दुसरे वर्ष, तिसरे वर्ष, तसेच अंतिम वर्ष बी.टेक विद्यार्थ्यांसाठी ओरिएंटेशन कार्यक्रमाचे आयोजन सोमवार, १४ जुलै २०२५ रोजी यशस्वीरीत्या करण्यात आले असल्याची माहिती महाविदयालयाचे प्राचार्य डॉ. कैलाश करांडे यांनी दिली.
डॉ. शिवशंकर कोंडुरु यांनी उपस्थित विद्यार्थ्यांना विभागाची ओळख, संस्थेचे ध्येय व मूल्ये, तसेच येणाऱ्या शैक्षणिक वर्षातील संधी आणि जबाबदाऱ्या याविषयी सखोल मार्गदर्शन केले. अभ्यासक्रमातील महत्त्वाचे विषय, निवडणुकीचे पर्याय, विविध स्पर्धा परीक्षा ( गेट, यूपीएससी इत्यादी ) विषयी माहिती देण्यात आली. तसेच वेळ व्यवस्थापन, साप्ताहिक अभ्यास नियोजन, इंटर्नशिप संधी, व्यावसायिक संस्था आणि विद्यार्थी मंडळे (जसे की IEEE), करिअर मार्गदर्शन व उच्च शिक्षणाच्या संधी, परीक्षा प्रणाली व मूल्यमापन प्रक्रिया, एनपीटीईएल सारख्या ऑनलाईन कोर्सेस, अंतिम वर्षाच्या प्रोजेक्टसाठी प्रभावी तयारीबाबत योग्य ते मार्गदर्शन करण्यात आले.
या कार्यक्रमाचा उद्देश विद्यार्थ्यांना तांत्रिक ज्ञानाबरोबरच दृष्टीकोन, आत्मविश्वास आणि उद्योगजगतातील स्पर्धात्मकतेची जाणीव निर्माण करून त्यांना पुढील शैक्षणिक प्रवासासाठी सज्ज करणे हा होता.
तसेच विभागप्रमुखांनी विद्यापीठ निकालांविषयी माहिती दिली आणि विद्यापीठात यश मिळवणाऱ्या गुणवंत विद्यार्थ्यांचे विशेष कौतुक केले.
कार्यक्रमाच्या शेवटी प्रश्नोत्तर सत्र घेण्यात आले, ज्यामध्ये विद्यार्थ्यांनी शैक्षणिक शंका, इंटर्नशिप, मिनी प्रकल्प, तसेच महाविद्यालयीन सुविधा यासंदर्भातील शंका स्पष्ट केल्या.
कार्यक्रमाचा समारोप आभारप्रदर्शनाने झाला. विद्यार्थ्यांचा उत्स्फूर्त प्रतिसाद हा यशस्वी शैक्षणिक वर्षाची सुरुवात दर्शवणारा ठरला. कार्यक्रम यशस्वी करणेकरीता विभागातील सर्व शिक्षक व शिक्षकेतर कर्मचारी यांनी विशेष परिश्रम घेतले.
पोस्ट्स
