सिंहगड पंढरपूर येथे क्रांतीसूर्य महात्मा फुले जयंती* : शिक्षण आणि समतेचा विचार विद्यार्थ्यांपर्यंत

 *सिंहगड पंढरपूर येथे क्रांतीसूर्य महात्मा फुले जयंती* : शिक्षण आणि समतेचा विचार विद्यार्थ्यांपर्यंत

पंढरपूर (प्रतिनिधी) - महात्मा ज्योतिराव फुले यांची जयंती एसकेएन सिंहगड कॉलेज ऑफ इंजिनियरिंग, पंढरपूर येथे मोठ्या उत्साहात आणि प्रेरणादायी वातावरणात साजरी करण्यात आली. कार्यक्रमाची सुरुवात दीपप्रज्वलन व प्रतिमापूजनाने झाली.

या प्रसंगी महाविद्यालयाचे उपप्राचार्य डॉ. स्वानंद कुलकर्णी यांच्या हस्ते दीपप्रज्वलन करण्यात आले. कार्यक्रमाला डॉ. चेतन पिसे, डॉ. शाम कुलकर्णी, डॉ. अल्ताफ मुलाणी, प्रा. समाधान माळी, प्रा. अमित भादुले, प्रा. अतुल कुलकर्णी, प्रा. महेश झाडे, प्रा. अनिल जाधव, श्री नवनाथ माळी, श्री. सिद्धेश्वर लवटे, संजय बनकर, वंदना माळी, गणेश वासेकर यांच्यासह मोठ्या संख्येने विद्यार्थी उपस्थित होते.

यावेळी मान्यवरांनी महात्मा फुले यांच्या जीवनकार्यावर प्रकाश टाकत त्यांच्या विचारांचे महत्त्व विद्यार्थ्यांना पटवून दिले. समाजातील अन्याय, विषमता आणि अज्ञान दूर करण्यासाठी शिक्षण हाच सर्वात प्रभावी मार्ग असल्याचे त्यांनी अधोरेखित केले.

महात्मा ज्योतिराव फुले हे भारतीय समाजसुधार चळवळीतील एक अग्रगण्य नेते होते. त्यांनी स्त्रीशिक्षण, शेतकरी हक्क, विधवा पुनर्विवाह आणि अस्पृश्यता निर्मूलनासाठी महत्त्वपूर्ण कार्य केले. सावित्रीबाई फुले यांच्या सहकार्याने त्यांनी पुण्यात मुलींसाठी पहिली शाळा सुरू केली, जे त्या काळात अत्यंत क्रांतिकारी पाऊल होते.

तसेच त्यांनी सत्यशोधक समाज स्थापन करून समाजात समता, बंधुता आणि न्याय प्रस्थापित करण्यासाठी संघर्ष केला. त्यांच्या ‘गुलामगिरी’ आणि ‘शेतकऱ्यांचा आसूड’ यांसारख्या साहित्यकृतींमधून त्यांनी समाजातील अन्यायकारक प्रथा आणि अंधश्रद्धांवर कठोर प्रहार केला.

कार्यक्रमात विद्यार्थ्यांनीही मनोगत व्यक्त करत महात्मा फुले यांच्या विचारांवर आधारित समाजनिर्मितीची गरज अधोरेखित केली. काही विद्यार्थ्यांनी त्यांच्या जीवनावर आधारित भाषणे सादर करून कार्यक्रम अधिक प्रभावी केला.

कार्यक्रमाच्या शेवटी सर्व उपस्थितांनी महात्मा फुले यांच्या आदर्शांचा अंगीकार करून समाजहितासाठी कार्य करण्याची शपथ घेतली. एकूणच हा कार्यक्रम प्रेरणादायी, ज्ञानवर्धक आणि समाजप्रबोधन करणारा ठरला.