*एस.के.एन. सिंहगड पंढरपूर येथे विद्युत अभियांत्रिकी विद्यार्थ्यांसाठी संशोधन व विकास विषयावर परिसंवाद*
पंढरपूर, दि. १९ जानेवारी २०२६ :
एस.के.एन सिंहगड पंढरपूर येथील विद्युत अभियांत्रिकी विभाग व आयईईई विद्यार्थी शाखा, एस.के.एन.सिंहगड कॉलेज ऑफ इंजिनियरींग, कोर्टी, पंढरपूर यांच्या संयुक्त विद्यमाने द्वितीय व तृतीय वर्ष विद्युत अभियांत्रिकी विद्यार्थ्यांसाठी “संशोधन व विकास प्रक्रिया, संशोधन नीतिमत्ता, निधीचे स्रोत व जागतिक उत्तम कार्यपद्धती” या विषयावर परिसंवादाचे यशस्वी आयोजन करण्यात आले.
या परिसंवादाचे उदघाटन महाविद्यालयाचे प्राचार्य डॉ. कैलाश जगन्नाथ करांडे यांच्या मार्गदर्शनाखाली संपन्न झाले. कार्यक्रमास प्रमुख उपस्थिती म्हणून डॉ. स्वानंद जी. कुलकर्णी, उपप्राचार्य व आयआयसी अध्यक्ष तसेच डॉ. के. शिवशंकर, विद्युत अभियांत्रिकी विभागप्रमुख व आयईईई विद्यार्थी शाखा समुपदेशक उपस्थित होते.
विद्यार्थ्यांमध्ये संशोधन व विकासाच्या मूलभूत संकल्पनांची ओळख करून देणे, संशोधनातील नीतिमत्तेचे महत्त्व समजावून सांगणे तसेच नाविन्यपूर्ण प्रकल्पांसाठी उपलब्ध राष्ट्रीय व आंतरराष्ट्रीय निधीच्या संधींबाबत माहिती देणे, हा या परिसंवादाचा मुख्य उद्देश होता.
कार्यक्रमाच्या प्रमुख पाहुण्या व मार्गदर्शक डॉ. उर्मिला बंडारू, संस्थापक व मुख्य कार्यकारी अधिकारी, टेश अकॅड इंटरनॅशनल कन्सल्टंट्स (एमएसएमई) व संशोधन सहयोगी, यांनी संशोधन व विकासाच्या संपूर्ण प्रक्रियेवर सविस्तर मार्गदर्शन केले. त्यांनी संशोधनातील नैतिक मूल्यांचे महत्त्व, निधी मिळविण्याच्या योग्य पद्धती तसेच आघाडीच्या संशोधन संस्था व उद्योगांमध्ये वापरल्या जाणाऱ्या जागतिक उत्तम कार्यपद्धती याविषयी मौल्यवान माहिती दिली.
परिसंवादादरम्यान विद्यार्थ्यांनी चर्चासत्रात उत्स्फूर्त सहभाग घेत उच्च शिक्षण, संशोधनासाठी निधी मिळविण्याच्या संधी तसेच प्रकल्प विकासासंबंधी विविध प्रश्न विचारून आपल्या शंकांचे निरसन करून घेतले. या उपक्रमाचे प्राध्यापकवर्गाकडून विशेष कौतुक करण्यात आले.
कार्यक्रमाच्या यशस्वी आयोजनासाठी समन्वयक, प्राध्यापक व विद्यार्थी स्वयंसेवकांचे आभार मानून कार्यक्रमाची सांगता करण्यात आली.
पोस्ट्स
