स्वेरीच्या शिरपेचात आणखी एक मानाचा तुरा!
स्वेरीज् कॉलेज ऑफ इंजिनिअरिंगला नॅकचे ‘ए प्लस’ मानांकन!!
पंढरपूर- ‘गोपाळपूर (ता. पंढरपूर) येथील श्री. विठ्ठल एज्युकेशन अँड रिसर्च इन्स्टिटयूट संचलित कॉलेज ऑफ इंजिनिअरिंग, पंढरपूरला देशातील शैक्षणिक क्षेत्रात महत्वपूर्ण असलेले ‘नॅक’ अर्थात ‘नॅशनल असेसमेंट अँड अॅक्रिडिटेशन कौन्सिल’ चे ३.४६ सीजीपीए सह ‘ए प्लस’ हे मानांकन मिळाले असून सदर मानांकन हे पुढील पाच वर्षांपर्यंत लागू असणार आहे. ए.आय.सी.टी.ई (ऑल इंडिया कौन्सिल फॉर टेक्निकल एज्युकेशन) व यु.जी.सी. (युनिव्हर्सिटी ग्रँटस कमिशन) यांच्याशी संलग्नित असणारे व ३.४६ सीजीपीए सह नॅकचे ‘ए प्लस’ मानांकन मिळविणारे स्वेरीज् कॉलेज ऑफ इंजिनिअरिंग हे सोलापूर विद्यापीठातील पहिले व एकमेव महाविद्यालय ठरले असल्याची माहिती स्वेरीचे संस्थापक सचिव व इंजिनिअरिंग कॉलेज चे प्राचार्य डॉ. बी. पी. रोंगे यांनी दिली.
‘नॅक’च्या प्रक्रियेचा भाग म्हणून महाविद्यालयाने पूर्वी एसएसआर (सेल्फ स्टडी रिपोर्ट) ‘नॅक’ कडे जमा केलेला होता. त्यानंतर महाविद्यालयाने पुरवलेल्या माहितीची पडताळणी झाल्यानंतर दि. २१ व २२ एप्रिल, २०२२ या दोन दिवशी ‘नॅक’च्या त्रिसदस्यीय समितीने महाविद्यालयास प्रत्यक्ष भेट देऊन महाविद्यालयातील सर्व भौतिक सुविधा, अध्ययन-अध्यापन पद्धती, विद्यार्थी पूरक सुविधा, महाविद्यालयाची शैक्षणिक उद्दीष्टे, अभ्यासक्रमाचा दर्जा व त्याची अंमलबजावणी, विद्यार्थ्यांची गुणवत्ता, शिक्षकांची गुणवत्ता, शैक्षणिक व पायाभूत सुविधा, कॅम्पस प्लेसमेंट, संशोधन तसेच यापूर्वी मिळालेल्या मानांकनापासून ते आतापर्यंत महाविद्यालयाने केलेली प्रगती व इतर महत्वपूर्ण बाबींची शहानिशा करून आपला अहवाल ‘नॅक’ कडे सादर केलेला होता.
‘नॅक’चे हे मानांकन मिळाल्यामुळे स्वेरीमधील शिक्षणाच्या दर्जावर पुन्हा एकदा शिक्कामोर्तब झाले आहे. या पूर्वी महाविद्यालयाला नॅकचे एकदा तर एनबीए चे दोनदा मानांकन मिळालेले आहे. ‘नॅक’ ही शैक्षणिक संस्थांना मानांकन देणारी देशातील स्वायत्त संस्था असून ‘नॅक’चे मानांकन असणार्‍या शिक्षण संस्थाना एक वेगळी ओळख प्राप्त होत असते. या मानांकनामुळे विद्यार्थी, पालक, नोकऱ्या देणाऱ्या कंपन्या व इतर समाज घटकांना येथील शिक्षणाच्या उच्च दर्जाबाबत खात्री मिळत असते. या मानांकनामुळे महाविद्यालयाला एक उच्च दर्जाचे गुणवत्ता प्रमाणपत्र मिळाल्याने, महाविद्यालयास विविध संस्थांकडून अधिक संशोधन निधी मिळण्यास मदत होईल.
स्वेरी मध्ये आर-वर्क ही ईआरपी प्रणाली अवलंबली जाते. स्वेरी अभियांत्रिकीला ‘नॅक’चे हे मानांकन प्राप्त होण्यामध्ये या वेब आधारित प्रणालीचा सिंहाचा वाटा आहे. ‘नॅक’ साठी आवश्यक असणारे सर्व विभागांचे सर्व रिपोर्ट्स या प्रणालीच्या माध्यमातून लीलया पद्धतीने तयार होतात आणि सर्व माहितीचे संकलन एकाच ठिकाणी होत असल्याने महाविद्यालयांना या प्रणालीचा खूपच मोलाचा फायदा होतो.
भाभा अणुसंशोधन केंद्राच्या माध्यमातून 'स्वेरी' मध्ये 'ग्रामीण मानव संसाधन विकास केंद्र' (आर.एच.आर.डी. एफ.) ची निर्मिती ज्येष्ठ अणूशास्त्रज्ञ पद्मविभूषण डॉ.अनिल काकोडकर यांच्या हस्ते उदघाटन करून करण्यात आली. या केंद्राच्या माध्यमातून पुढे समाजोपयोगी आणि ग्रामीण उद्योजकता वाढविण्याच्या हेतूने तसेच उपयोगी तंत्रज्ञान ग्रामीण भागातील लोकांपर्यंत पोहचवण्यासाठी विविध उपक्रम हाती घेण्यात आले. 'नॅशनल नॉलेज नेटवर्क'च्या माध्यमातून स्वेरीमध्ये उत्तम दर्जाची व हाय स्पीड इंटरनेट सुविधा उपलब्ध करण्यात आली. सन २०१६, २०१८ व २०२० या तीन वर्षी 'टेक्नो-सोसायटल' या आंतरराष्ट्रीय परिषदेच्या माध्यमातून समाजाशी निगडित असलेल्या समस्या सोडवण्यासाठी आणि ग्रामीण भागातील तंत्रज्ञानाला चालना मिळण्यासाठी आंतरराष्ट्रीय पातळीवरील परिसंवाद आयोजित करण्यात आले होते.
आजपर्यंत जवळपास २९ संशोधन प्रकल्पांसाठी सुमारे नऊ कोटी रुपयांपेक्षा जास्त संशोधननिधी राजीव गांधी सायन्स अँड टेक्नॉलॉजी कमिशन, ए. आर.डी. बी., मॉडरॉब, भाभा अणुसंशोधन केंद्र, डी. एस.टी., युजीसी, बी.आर.एन.एस.,डी. बी.टी. आदी संस्थांकडून प्राप्त झाला असून या निधी मधूनच कांही संशोधन प्रकल्प पूर्ण झाले आहेत तर कांही प्रकल्प पूर्णत्वाच्या मार्गावर आहेत. या निधीच्या माध्यमातून 'स्वेरी' मध्ये विविध अद्ययावत प्रयोगशाळांची निर्मिती करण्यात आली आहे. त्यामध्ये ऍडव्हान्स्ड मॅन्युफॅक्चरिंग लॅब, चेन टेस्टिंग लॅब, व्हायब्रेशन अनालिसिस लॅब, एन.डी. टी. लॅब, लोडींग फ्रेम फॅसिलिटी, ऍडव्हान्स्ड डिझाइन अँड सिम्युलेशन लॅब, अँटेना डिझाइन लॅब इ. चा समावेश आहे. राष्ट्रीय व आंतरराष्ट्रीय पातळीवरील विविध संस्थांसोबत सुमारे ४७ सामंजस्य करार करण्यात आले असून त्याद्वारे विद्यार्थ्यांच्या आणि शिक्षकांच्या बौद्धिक विकासास आणि तांत्रिक कौशल्य वाढीस चालना मिळत आहे. 'स्वेरी' तील पदवी अभियांत्रिकीचाच विचार केला तर एकूण २६ प्राध्यापक पीएच.डी. धारक असून आणखी ३५ प्राध्यापक पीएच.डी. पुर्ण करण्याच्या मार्गावर आहेत. स्वेरीमध्ये विद्यार्थ्यांसाठी आणि शिक्षकांसाठी असणाऱ्या संशोधनपूरक वातावरणामुळे आणि प्रोत्साहनपर धोरणामुळे गेल्या पाच वर्षात ५३६ पेक्षा जास्त संशोधनपर लेख प्रसिद्ध झाले आहेत. स्वेरीतील टेक्नो-सोसायटल च्या शोधनिबंधाना आंतरराष्ट्रीय 'स्कोपस' चा दर्जाही प्राप्त झाला आहे. आजपर्यंत सुमारे चाळीस पुस्तके प्रकाशित झाली असून १४ पेटंट्स देखील दाखल करण्यात आले आहेत. या सर्व बाबींमुळे महाविद्यालयाच्या शैक्षणिक दर्जामध्ये भर पडून त्याचे या मानांकनाच्या माध्यमातून फलित झाले आहे.
यापूर्वी २००९ साली पहिल्याच प्रयत्नात एन.बी.ए. मानांकन, २०१७ साली पुन्हा एन.बी.ए. मानांकन मिळविण्यात महाविद्यालयास यश प्राप्त झाले होते. आपले शैक्षणिक उद्दीष्टे पूर्ण करीत संस्थेचा विकास साधण्याच्या भूमिकेतून संस्थेने नेहमीच प्रमाणित करणाऱ्या विविध संस्थाकडून मानांकने मिळवून वेळोवेळी आपला दर्जा व शैक्षणिक गुणवत्ता सिध्द केली आहे. या मानांकनामध्ये नॅक (नॅशनल असेसमेंट अँड अॅक्रिडिएशन कौन्सिल), टी.सी.एस (टाटा कल्संटन्सी सर्विसेस), आय.ई.आय. (इन्स्टिटयूशन इंजिनिअर्स ऑफ इंडिया) तसेच आय.एस.ओ. ९००१:२०१५ व यु.जी.सी.चे २ एफ व १२ बी प्रमाणपत्र, तंत्रशिक्षणातील सर्वोच्च असे एन.बी.ए. मानांकन ही चारही मानांकने सर्व पात्र पदवी अभ्यासक्रमांना मिळालेली आहेत.
‘नॅक’ चे हे ‘ए प्लस’ मानांकन मिळवण्यासाठी स्वेरीचे संस्थापक सचिव व इंजिनिअरिंग कॉलेज चे प्राचार्य डॉ. बी. पी. रोंगे, स्वेरीचे अध्यक्ष, उपाध्यक्ष आणि सर्व विश्वस्त यांच्या मार्गदर्शनाखाली, शैक्षणिक अधिष्ठाता डॉ. प्रशांत पवार व आय.क्यू.ए.सी. समन्वयक डॉ. संदीप वांगीकर यांच्या नेतृत्वाखाली प्रा. डी. टी. काशीद, प्रा. एस. वाय. साळुंखे, प्रा. पी.जी.गायकवाड, प्रा. एस.ए.इनामदार, डॉ. एम.एस.मठपती, प्रा.एम.एम.भोरे, प्रा. एस.एम. कर्वे, कॅम्पस इन चार्ज, सर्व अधिष्ठाता, सर्व विभागप्रमुख, स्वेरी परिवारातील व अभियांत्रिकी महाविद्यालयातील सर्व शिक्षक व शिक्षकेतर कर्मचारी यांनी परिश्रम घेतले. या यशाबद्दल स्वेरीचे संस्थापक सचिव व प्राचार्य डॉ.बी.पी. रोंगे, संस्थेचे अध्यक्ष नामदेव कागदे, उपाध्यक्ष अशोक भोसले तसेच संस्थेचे विश्वस्त व पदाधिकारी, स्वेरी कॅम्पस इन्चार्ज, स्वेरी अंतर्गत असलेल्या इतर महाविद्यालयांचे प्राचार्य, अधिष्ठाता, विभागप्रमुख, प्राध्यापक वर्ग, शिक्षकेतर कर्मचारी, विद्यार्थी व पालकांनी सर्वांचे अभिनंदन केले. कॉलेजचे इन्फ्रास्ट्रक्चर, कल्चर, कॅम्पस प्लेसमेंट, अल्पावधीत निर्माण झालेले संशोधनाचे वातावरण, विद्यापीठात सर्वोच्चस्थानी असलेले शैक्षणिक निकाल आणि याच्या पंक्तीला ‘नॅक’ चे ‘ए प्लस’ हे मानांकन मिळाल्यामुळे विद्यार्थ्यांबरोबरच पालक वर्गात देखील समाधानाचे वातावरण निर्माण झाल्याचे दिसून येत आहे.
पोस्ट्स
