एस.के.एन. सिंहगड कॉलेज ऑफ इंजिनिअरिंग येथे स्टार्टअपसाठी भांडवल उभारणी व आर्थिक व्यवस्थापन कार्यशाळा संपन्न
पंढरपूर (प्रतिनिधी) :
सावित्रीबाई फुले शिक्षण प्रसारक मंडळ संचलित एस.के.एन. सिंहगड कॉलेज ऑफ इंजिनिअरिंग, कोर्टी (ता. पंढरपूर, जि. सोलापूर) येथील उद्योजकता विकास कक्ष व इन्स्टिट्यूशन इनोव्हेशन कौन्सिल यांच्या संयुक्त विद्यमाने “स्टार्टअपसाठी भांडवल उभारणी व आर्थिक व्यवस्थापन” या विषयावर कार्यशाळेचे आयोजन शनिवार, दि. ३१ जानेवारी २०२६ रोजी करण्यात आले.
या कार्यशाळेसाठी प्रमुख मार्गदर्शक म्हणून मा. श्री. नंदकुमार दुपडे (प्रेरणादायी वक्ते व माजी तज्ज्ञ, एमसीईडी) उपस्थित होते. त्यांनी स्टार्टअप सुरू करताना आवश्यक असलेली आर्थिक नियोजन प्रक्रिया, गुंतवणूकदारांकडून निधी मिळविण्याच्या संधी, व्यवसाय आराखडा, खर्च नियंत्रण, नफा-तोटा विश्लेषण तसेच शाश्वत आर्थिक व्यवस्थापन याबाबत सखोल मार्गदर्शन केले. विद्यार्थ्यांनी विचारलेल्या विविध प्रश्नांना त्यांनी समर्पक उत्तरे देऊन उद्योजकतेकडे वाटचाल करण्यासाठी प्रेरणा दिली.
कार्यक्रमास महाविद्यालयाचे उपप्राचार्य व आयआयसी अध्यक्ष, डॉ. स्वानंद जी. कुलकर्णी यांच्या मार्गदर्शनाखाली प्रा. दत्तात्रय कोरके आयआयसी उपाध्यक्ष तसेच प्रा. महेश झाडे, प्रा. लक्ष्मीकांत जोशी व प्रदीप व्यवहारे यांनी विशेष परिश्रम घेतले.
या कार्यशाळेला महाविद्यालयातील विद्यार्थी व प्राध्यापकांनी मोठ्या संख्येने उपस्थिती लावून उत्स्फूर्त प्रतिसाद दिला. या उपक्रमामुळे विद्यार्थ्यांमध्ये स्टार्टअप व नवोपक्रमाविषयी जागरूकता निर्माण होऊन त्यांना उद्योगजगताची प्रत्यक्ष माहिती मिळाल्याचे मत उपस्थित विद्यार्थ्यांनी व्यक्त केले.
कार्यक्रमाचे सूत्रसंचालन व आभारप्रदर्शन श्रीया जोशी व रियान बागवान यांनी केले. महाविद्यालयाचे प्राचार्य डॉ. कैलाश करांडे यांनी ही कार्यशाळा यशस्वीपणे पूर्ण केल्याबद्दल कौतुक केले.
