*पंढरपूर सिंहगड अभियांत्रिकी महाविद्यालयातील यांत्रिकी अभियांत्रिकी विद्यार्थ्यांची नाशिक येथे उद्योगभेट यशस्वी*
एस.के.एन. सिंहगड अभियांत्रिकी महाविद्यालय, कोर्टी-पंढरपूर येथील यांत्रिकी अभियांत्रिकी विभागाच्या वतीने द्वितीय व तृतीय वर्षातील विद्यार्थ्यांसाठी दिनांक २४ व २५ जानेवारी २०२६ रोजी नाशिक येथील नामांकित उद्योगांना शैक्षणिक उद्योगभेट आयोजित करण्यात आली होती. विद्यार्थ्यांना सैद्धांतिक ज्ञानासोबत प्रत्यक्ष औद्योगिक अनुभव मिळावा तसेच उद्योगाभिमुख कौशल्यांचा विकास व्हावा, हा या उद्योगभेटीचा मुख्य उद्देश होता.
या उद्योगभेटीअंतर्गत विद्यार्थ्यांनी सिन्नर (नाशिक) येथील हेरंबा कॉम्पोझिट्स व अॅडमंट इंजिनिअर्स प्रा. लि. या अग्रगण्य उद्योगांना भेट दिली. हेरंबा कॉम्पोझिट्स येथे विद्यार्थ्यांना एसएमसी/डीएमसी आधारित संयुग पदार्थ निर्मिती प्रक्रिया, साचेमोल्डिंग तंत्रज्ञान, गुणवत्ता नियंत्रण प्रक्रिया, अग्निसुरक्षा मानके तसेच औद्योगिक उपयोग याविषयी सविस्तर माहिती देण्यात आली.
अॅडमंट इंजिनिअर्स प्रा. लि. येथे विद्यार्थ्यांना फायबरग्लास बळकटीकरण प्लास्टिक (एफआरपी) उत्पादने, संरचनात्मक व औद्योगिक घटकांची निर्मिती प्रक्रिया, उत्पादनातील विविध टप्पे, चाचणी पद्धती तसेच गुणवत्ता व्यवस्थापन प्रणालीचे प्रत्यक्ष निरीक्षण करण्याची संधी मिळाली.
या उद्योगभेटीमुळे विद्यार्थ्यांना संयुग पदार्थ व एफआरपी तंत्रज्ञानाचे सखोल ज्ञान, औद्योगिक कार्यपद्धतीची ओळख, गुणवत्ता व सुरक्षितता मानकांची समज तसेच भविष्यातील करिअर संधींबाबत उपयुक्त मार्गदर्शन मिळाले. विद्यार्थ्यांनी ही उद्योगभेट अत्यंत उपयुक्त, ज्ञानवर्धक व प्रेरणादायी असल्याची प्रतिक्रिया व्यक्त केली.
ही उद्योगभेट महाविद्यालयाचे प्राचार्य डॉ. कैलास जगन्नाथ करांडे, उपप्राचार्य डॉ. स्वानंद जी. कुलकर्णी तसेच यांत्रिकी अभियांत्रिकी विभागप्रमुख डॉ. एस. एस. कुलकर्णी यांच्या मार्गदर्शनाखाली यशस्वीपणे पार पडली. या औद्योगिक भेटीचे समन्वयक प्रा. अनिल जाधव, प्रा. अतुल कुलकर्णी, प्रा. ऋषिकेश देशपांडे व प्रा. धनंजय गिराम यांनी उत्कृष्ट नियोजन, समन्वय व विद्यार्थ्यांना सतत मार्गदर्शन करून ही उद्योगभेट यशस्वी केली.
विद्यार्थ्यांच्या व्यावहारिक शिक्षणासाठी, कौशल्यविकासासाठी व उद्योगसुसंगत अभियंते घडविण्याच्या दृष्टीने ही उद्योगभेट अत्यंत महत्त्वपूर्ण ठरली.
पोस्ट्स
