पंढरपूर सिंहगडच्या यांत्रिकी विभागात “इलेक्ट्रिक वाहनांसाठी मोटर्स व कंट्रोलर्स” या विषयावर एकदिवसीय कार्यशाळा*

 *पंढरपूर सिंहगडच्या यांत्रिकी विभागात “इलेक्ट्रिक वाहनांसाठी मोटर्स व कंट्रोलर्स” या विषयावर एकदिवसीय कार्यशाळा*

पंढरपूर, सप्टेंबर २०२५ - एस. के. एन. सिंहगड कॉलेज ऑफ इंजिनिअरिंग, कोर्टी, पंढरपूर येथील यांत्रिकी अभियांत्रिकी विभागातर्फे तृतीय वर्षाच्या विद्यार्थ्यांसाठी “इलेक्ट्रिक वाहनांसाठी मोटर्स व कंट्रोलर्स” या विषयावर एकदिवसीय कार्यशाळेचे आयोजन करण्यात आले. याबाबत माहिती विभागप्रमुख डॉ. श्याम कुलकर्णी यांनी दिली.

या कार्यशाळेचा उद्देश विद्यार्थ्यांना ई-मोबिलिटी क्षेत्रातील नव्या तंत्रज्ञानाची सैद्धांतिक व प्रात्यक्षिक माहिती देणे असा होता. कार्यशाळेची सुरुवात दीपप्रज्वलन सोहळ्याने करण्यात आली. त्यानंतर प्रमुख अतिथी म्हणून उपस्थित असलेल्या श्री. शंकर वदणे (शिक्षणतज्ञ व ई-वाहन विशेषज्ञ) यांचा विभागप्रमुख डॉ. कुलकर्णी यांच्या हस्ते सत्कार करण्यात आला. यावेळी डॉ. एस. आर. कोळी यांनी अतिथींचा परिचय करून देताना त्यांच्या ई-व्हेईकल्स क्षेत्रातील कार्याची माहिती दिली.

मुख्य सत्रात श्री. शंकर वदणे यांनी विद्यार्थ्यांना मोटर्स व कंट्रोलर्सचे प्रकार, कार्यपद्धती, उपयोग व निवड निकष याविषयी सविस्तर मार्गदर्शन केले. विशेषतः सुरक्षितता, कार्यक्षमता व खर्च या दृष्टिकोनातून योग्य निवड कशी करावी यावर त्यांनी भर दिला. यासोबतच, ई-वाहन उद्योगातील वाढ, तांत्रिक प्रगती व भविष्यातील संधी याविषयीही विद्यार्थ्यांना महत्त्वपूर्ण माहिती मिळाली.

कार्यशाळेच्या दुसऱ्या टप्प्यात विद्यार्थ्यांसाठी औद्योगिक भेट आयोजित करण्यात आली होती. माने मोटर्स, पंढरपूर येथे ही भेट घेण्यात आली. यावेळी विद्यार्थ्यांना मोटर्स, कंट्रोलर्स आणि प्रगत बॅटरी तंत्रज्ञान (सॉलिड-स्टेट व LFP बॅटरी) यांची प्रत्यक्ष माहिती मिळाली. त्यांनी माने मोटर्सद्वारे विकसित केलेले नवकल्पनायुक्त ई-वाहन डिझाइन्स व प्रोटोटाइप्स प्रत्यक्ष पाहिले. या भेटीसाठी प्रा. व्ही. व्ही. नवले यांनी विद्यार्थ्यांना मार्गदर्शन केले.

कार्यशाळेचा समारोप प्रा. आर. के. शिंदे यांच्या आभार प्रदर्शनाने झाला. त्यांनी प्रमुख अतिथी, माने मोटर्सचे प्रतिनिधी आणि उपस्थित सर्वांचे मनःपूर्वक आभार मानले.

ही कार्यशाळा विद्यार्थ्यांसाठी शैक्षणिक आणि औद्योगिक अनुभव मिळवण्याची अमूल्य संधी ठरली. यामुळे वर्गात शिकलेल्या संकल्पनांचा प्रत्यक्ष औद्योगिक उपयोग कसा केला जातो, याचा स्पष्ट संदर्भ मिळाला. यांत्रिकी विभागाने अशा उद्योगाभिमुख उपक्रमांच्या माध्यमातून विद्यार्थ्यांना अत्याधुनिक ज्ञान व कौशल्ये आत्मसात करण्यासाठी कटिबद्ध असल्याचे या उपक्रमातून अधोरेखित झाले.

कार्यशाळेच्या यशस्वी आयोजनासाठी विभागातील सर्व शिक्षकवृंद व शिक्षकेतर कर्मचाऱ्यांनी मोलाचे योगदान दिले.